:) تعالو نتعلم القرآن مع بعض بكل بساطة

السلام عليكم و رحمة الله و بركاته.....*

احبيى فى الله....*

احببت ان اهدى لكم بعض ما تعلمته لعله يشفع لى فى قبرى يا رب.....*

طلب صغير فى الاول ياريت كل واحد او واحدة تجيب مصحف قدامها و هى بتقرا الموضوع ....*

سنبدأ بسورة الاخلاص بإذن الله

و
احب ان اقول للمش عارف ايه سورة الاخلاص انت كده فى مرحلة الخطر و ياريت
تهتم بدينك شوية بقى ,مافيش وقت و عموما سورة الاخلاص هى البدايتها
"قل هو الله احد"


المهم

الاول بالنسبة للبسملة الهى "بسم الله الرحمن الرحيم"

هنقولها ازاى؟

هتبقى كدة:
بى:هنكسر حرف الباء جامد

سس:

حرف
السين مش عليه تشكيل يعنى حرف ساكن فى البسملة فهننطقو عادى من غير ما
نفتح او نكسر او نضم ولكن هنزود عليه همس يعنى هنطلع شويه هواء مع الحرف
من بين سننا

مى:

حرف الميم مكسور يعنى تحتيه كسرة زى حرف الباء هنكسره جامد

حرف الالف:

اهههه بصو بقى حرف الالف الفى لفظ الجلالة الفى البسملة لا ينطق ,ليه بقى علشان دى همزة وصل و لما بتيجى فى وسط الكلام لا تنطق
لكن اذا ظهرت فى اول الكلام فلازم تنطق مثل لفظ الجلالة فى اية الكرسى "الله لا اله الا هو ...."

قولنا ايه هنا بدأنا بالهمزة يعنى نطقناها كدة ألله

لكن هنا فى البسملة هندخل على اللام على طووول من غير ما ننطق الالف

حرف اللام:

هنا حرف اللام مشدد يعنى ايه
الحرف المشدد متكون من حرفين حرف ساكن و حرف مشكل لذلك عند القراءة هنقف شويه على حرف اللام و بعدين نفتحه
علشان الشدة الشبه حرف السين الهى فوق حرف اللام عليها فتحة.


هى:

حرف الهاء برده هنكسره جامد زى الباء و الميم علشان تحتيه كسرة

حرف الالف :

زى مقولنا فوق ان همزة الوصل وسط الكلام لا تنطق

حرف اللام:

اللام
هنا لام شمسية ايوة الحاجات الاخدناها فى حضانة دى يا رب تكونو فاكرنها,
زى كدة كلمة "الشمس" بننطقها اشمس عشان اللام هنا شمسية , وعشان هى شمسية
هنا فى كلمة الرحمن فامش هننطقها برده

حرف الراء:

هنا حرف الراء مشدد زى اللام فى لفظ الجلاله فابرده هنقف عليه شوية و بعدين نفتحه

حرف الحاء :

حرف الحاء ساكن فى البسملة فهنقف عليه شوية بس من غير تشكيل , بنعرف ازاى بقى ان الحرف ساكن ؟
لما نلاقى فوق الحرف علامة صغنتوتة كدة تشبة حرف الحاء

ما:

هنا حرف الميم مفتوح يعنى عليه فتحة فهنفتحه و لكن استنى ده فى حاجة تانية فوق الميم علامة تشبه الالف بس صوغايرة ايه دى؟

دى اسمها الف صغيرة و لما بنلقيها فوق اى حرف بننطق الحرف ولكن كأنه بعديه الف .

نى:

حرف النون مكسور يعنى تحتيه كسرة فهنكسر جامد برده.

حرف الالف:

همزة وصل وسط الكلام لا تنطق.

حرف اللام:

لام شمسية لا تنطق زى ما قولنا

را :

حرف الراء مشدد فهنقف عليه شوية و بعدين نفتحه.

حى:

حرف الحاء مكسور فهنكسره جامد علشان تحتيه كسرة.

حرف الياء :

هنا حرف الياء مش عليه تشكيل فهنقف عليه شوية صح ؟
لأ طبعا ايه ركزو معايا هو اه
حرف الياء اه من غير تشكيل لكن مش عليه العلامة الصغيرة الاتفقنا عليها الهى شبه حرف الحاء
فهنمده شوية و على فكرة حروف المد " لالف و الياء و الواو"
احفظوها بكلمة: "واى"

حرف الميم:

هنا حرف الميم مكسور فهنكسره لو هنكمل على كلمة قل و لكن لو هنسكت و بعدين نبدأ فا مش هنكسر الميم

يعنى هتتنطق كلها على بعضها كده

بيسسميللاهيرحمانيراحيييم

يا رب تكون وصلت

و الـلــــــه اعلم

وبالنسبة لسورة الاخلاص هأجلها شوية عشان بس اعرف هل استفادتو فأكمل ولا اسلوبى كان مش مفهوم فأقف

يا رب تكونو استفادتو يااااااااااا رب

منتظرة تعليقتكم لكى اعرف

و لو اى حد يحب يسأل اى سؤال فأى خدمة

اللهم اجعل هذا العمل خالصاً لوجهك الكريـــــم

و جزاكم الله كل خيــــــــــــر


اختكم فى الله * ديــنــا = امة الرحمن

ربنا يبركلك يا رب

بجد أنا أول مره أرى هذه الطريقه فى تعلم قرأة القرأن وان ما أعرفه هو التلقى لذلك إذا كنت أدعو إلى ان يحفظ الواحد على يد أخ أو أخت متقنه للقرأة فلو نفعت هذه الطريقه مع أحد أى جربت أو أخذتيها من أحد فأرجو أعلامى حتى أعمل بها فى منتديات أخرى ولو كنت تجربيها وهى منك فأرجو ان تسألى أهل العلم فى ذلك ................. شكرا شكرا شكرا سأنتظر رد

السلام عليكم و رحمة الله و بركاته يا اخ محمد

انا الحمد لله محفظة قرآن-(اطفال)- فى دار اسمه الفوزان بالاسكندرية

و لو على الاسلوب ده اسلوبى انا مش نقلاه عن حد بس يا رب تكون قدرت توصل لاصدى او يا رب تكون وصلت بس هو طبعا احسن اسلوب هو العملى عن طريق السمع بس انا حبيت افيدكم بمعلوماتى المتواضعة و مالقتش غير الاسلوب ده و بجد اتمنى ان يكون حد استفاد
و لو فى حاجة مش واضحة فا ياريت تقولى

و الكلام ده انا اتعلمته فى الدار عن طريق كورس اسمه القاعدة النورانية او قاعدة نور البيان
و هو مافيهوش اى حاجة غريبة كلو من النحو و التجويد

و الله اعلم و جزاك الله كل خيـــــــر